سرچینې: طالبانو د اسلامي بانکدارۍ په نوم په کندهار کې ۷۰ سلنه بانکي راکړې ورکړې درولې دي
سرچینې په کندهار کې د بانکونو د مسؤلینو له قوله وايي چې اوس یوازې د حوالې او پیرودونکو ته د پیسو ورکولو خدمتونه وړاندې کېږي.
سرچینې په کندهار کې د بانکونو د مسؤلینو له قوله وايي چې طالبانو د اسلامي بانکدارۍ د ترویج په نوم په دې ولایت کې شاوخوا ۷۰ سلنه بانکي راکړې ورکړې درولې دي.
د جمعې په ورځ، د لړم په ۲۹مه، د دغو سرچینو له قوله راپور شوی چې د بانکونو مسؤلینو دا موضوع د اسلامي بانکدارۍ د پوهاوي په اړه په یوه یوورځني سیمینار کې مطرح کړې ده.
د سرچینو په وینا، اوس په کندهار کې یوازې د حوالې او پیرودونکو ته د پیسو ورکولو خدمتونه وړاندې کېږي او طالبانو د بانکي خدمتونو پر نورو برخو سخت بندیزونه لګولي دي.
دا سرچینې زیاتوي چې په ټوله کې په افغانستان کې د بانکونو فعالیت له ستونزو سره مخ دی او ډېر بانکونه نه شي کولی خپل ګټور فعالیت ته دوام ورکړي. د دوی په وینا، د پخواني نظام له ړنګېدو وروسته په کابل او ولایتونو کې بانکونو د خپلو کارکوونکو شمېر کم کړی او اوس په بانکي څانګو کې یوازې یو محدود شمېر کارکوونکي کار کوي.
طالبانو له بیا واکمنېدو راهیسې د هېواد د بانکي نظام اسلامي بانکدارۍ ته پر اړولو ټینګار کړی او د ګټې اخیستل او ورکول له خپلو دیني باورونو سره ناسم ګڼي. نیوکه کوونکي وايي چې د بدیلو مالي وسایلو او زېربناوو له برابرولو پرته د دې پالیسۍ په بیړه پلي کول د خلکو او سوداګرو باور پر بانکونو کم کړی دی.
د افغانستان بانکي نظام د ۲۰۲۱ کال له اګست وروسته له جدي ننګونو سره مخ شو؛ په ګډون د بهر کې د مرکزي بانک د اسعارو د زېرمو کنګل کېدل، د بندیزونو محدودیتونه او له افغان بانکونو سره د ډېرو بهرنیو بانکونو د اړیکو پرې کېدل. دې وضعیت لامل شوی چې د مالي راکړو ورکړو لویه برخه غیر رسمي بازارونو او صرافانو ته ولېږدول شي.
کندهار د افغانستان د سویل یو مهم سوداګریز مرکز او د طالبانو د مشر د اوسېدو ځای دی او له پاکستان سره په سوداګرۍ کې مهم رول لري. په دې ولایت کې بانکي بندیزونه کولی شي د سوداګرو پر فعالیت اغېز وکړي.
طالبانو تر اوسه د دې راپور په اړه رسمي غبرګون نه دی ښودلی.
د بانو راپورونه، مستند او خپرونې په یوټیوب کې وګورئ.
▶ بانو تلوېزیون وګورئ



